Gréng ass dat neit Brongt

Sinn ech deen Eenzegen, deem et beim Liesen vum RTL Artikel sauer opstéisst?

Dem André Hoffmann vun déi Lénk hu se ugebueden, déi néideg Ënnerschrëften ze ginn, fir Motiounen an Amendementer kënnen anzereechen. Dem ADR hëllefen déi Gréng op déi selwecht Art a Weis – allerdéngs nëmmen, bei Motiounen an Amendementer déi an den „normalen Bunnen“ wären.

Net, dass mech esou eppes iwwerascht. Den Hugo Boss François Bausch ass jo dofir bekannt, eng Schläimspuer hannert sech ze zéien em déi e sämtlech Schlécken op der Welt beneiden. Ech hunn et awer positiv fonnt, ewéi Déi Gréng erklärt hunn si géingen guer net eréischt a Koalitiounsverhandlungen mat der CSV goen. Mee vläit waren d’Chrëschten hinnen och einfach net wäit genuch riets am politesche Spektrum. Ech froen mech op eng lénks Partei nach esou glaawwürdeg ass wann se eng rietsextreem Partei ennerstëtzen geet – eng Partei, déi de Wieler iwwerhaapt net wëll als Fraktioun hunn. Wéi définéieren déi Gréng dann “normal Bunnen”? D’NSDAP hat firun ronn achtzeg Joer och als legitim Partei ugefaangen, an si hunn an “normale Bunnen” gehandelt, andeems se hiert Wahlerspriechen agehalen hunn, Arbëchtsplazen z’erschafen (a mir wëssen jo all, firwat déi Autobunnen wierklech gebaut goufen). Fakt ass: et kennt een ni déi wierklech Agenda vun enger Partei. An wann dat eng rietsextreem Partei ass, weist eis d’Geschicht dach kloër, dass een soll d’Fangeren dovunner loossen. Ma vläit wëllen déi Gréng jo och – wéi de Feierkrop et sou schéin genannt huet – “Endléisungen fir Lëtzebuerg”.

Oh… Ech héieren déi Gréng elo schon jäizen, dat wier alles am Sënn vun der Demokratie! All Stëmm an der Chamber muss gehéiert ginn. Richteg. Awer Demokratie heescht nun eemol leider, dass d’Vollék herrscht – an d’Vollék huet seng Meenung bei de Wahlen jo extreem däitlech gemach: et wëll vill manner Afloss fir d’Alternativ Demagogesch Réckstännegkeetspartei.

10 thoughts on “Gréng ass dat neit Brongt”

  1. Ech ginn der an der Saach zum Deel recht, ech fannen déng Formuléierung, virun allem den Titel, awer e besse vill iwwerzunn.

    “D’Ennerstetzung” fir den ADR reduzéieren sech héchstens op Froen, wou si dann ausnahmsweis emol eppes richteges wéilten, wat an der Vergaangenheet sielen awer heiensto de Fall war. Wat mech éischter stéiert, ass datt iwwerhaapt sou Ennerstetzungen ausgeschwat ginn. Wouzou soll dat dengen? Ech fannen et selbstverständlech, anerer ze ennerstetzen, wann se dat selwecht wellen wéi ee selwer, egal op dat déi Lénk, d’ADR oder soss eng Partei ass. Eng Partei aus Prinzip emmer ennerstetzen fannen ech dobäi genau sou falsch, ewéi eng aus Prinzip emmer ze boykotéieren. Wann den ADR zB eppes an der Chamber abrénge géif fir d’Trennung vu Kierch a Stat, da géif ech net hi goen an dat net ennerstetzen just well et vum ADR kennt.

    Sou onsenneg wéi ech déi zitéiert Aussoen fannnen, muss ech anersäits awer och soen, dass d’Medien do erem aus enger Meck en Elfant gemat hunn. Déi Ausso ass allenfalls de Rand vum Rand gewiert.

  2. Et misst een villäicht mol rem riets-extrem definéieren? D’ADR ass definitiv eng riets (an majoritärement domm) Partei, dat heescht awer net, dass se riets-extrem sinn oder nie eng gutt Iddi hunn.

    Ech ginn dem Manuel Recht: firwat soll een, falls se mol eng Kéier eng gutt Iddi hunn, déi net och ënnerstëtzen. Auch ein blindes Huhn findet mal ein Korn …

    Ech fannen dësen Post hei iwwerdriwwen polemesch.

  3. Mech stéiert, wéi s du och sees Manuel, virun allem dass se higinn an déclaréieren, zwou bestëmmte Parteien wëllen z’ennerstëtzen. Lo läit dat jo eben dorunner, dass déi Lénk an den ADR keng Fraktioun sinn, an domatter als eenzeg Ennerschrëften vun enger anerer Partei brauchen. Mee firwat géing déi Fro dann net geklärt ginn, wann d’Situatioun géing entstoen. Firwat elo soen: mir ginn iech d’Ennerschrëften, amplaz de Bak ze halen. Wann dann en effet den ADR géing mat enger Propositioun ugelaatscht kommen fir d’Trennung vu Kierch a Staat, dann kéinnten déi Gréng jo dann ennerteneen driwwer diskutéieren, op se dat matdroen wëllen.

    Jo, Grommel, de Post ass polemesch. Et gefällt mer halt muenchmol ze provozéieren. My blog is my castle. Oder sou. :D Firwat ech esou polemesch réagéieren ass, well déi Gréng den ADR schon oft ennerstëtzt hunn. Ech hunn mer aus zouverlässege Quellen soen gelooss, dass et schon bei den Table Ronden vun den Jugendparteien déi Gréng waren, déi drop insistéiert hunn den adrenalin anzelueden, an deenen domatter eng Plattform ze ginn ouni jemols eppes um organisatoreschen Plang matgehollef ze hunn. Jo, ech wëll déi Gréng provozéieren. Ech wëll iwwerhaapt Politiker provozéieren. Well ech wëll wëssen, wéi trei se hierem Wuert wierklech sinn.

    Mussen mer rietsextrem nei définéieren? Et kann een jo awer ethnizistesch an antipluralistesch (d’Héichhierwen vun der lëtzebuergerscher Sprooch an der lëtzebuergescher Kultur) an autoritär (d’blannt Verteidegen vum Grand Duc fir d’Bewahren vun der Hierarchie) Tendenzen am ADR erkennen…

  4. Thierry,

    zu dengem éischten Abschnitt: absolut d’accord.

    zu dir Saach mat de Jugendparteien:

    Effektiv hu mär als jonk Gréng am Kader vun deenen Tables Rondes dofir gesuergt, datt all Parteien invitéiert ginn. Déi aner wollten et just fir déi “4 grouss” man. Mär waren awer der Meenung, datt et bei Tables Rondes dorems geet, datt sech déi verschidde Parteien op gläicher Aenhéischt treffen sollten, sou dat sech den Zuschauer opgrond vun engem Argumentaustausch e Bild maache kann, wien am iwwerzeegensten ass. Et get a mengen Aen kee Grond, déi Lénk, d’KPL an d’ADR do auszeschléissen.

    Iwwerhaapt fannen ech d’Approche kontraproduktiv, den ADR wellen ze boykotéieren oder em keng Plattform ze ginn. Duerch déi Ausgrenzung plazéiers de en an eng Opferroll, wat en éischter nach stärkt ewéi schwächt, well en dann d’Kaart vum Aussesäiter, vun der “Alternative” erreicht sou richteg spille kann. Ech mengen, datt et besser ass, den ADR op enger fairer Plattform erauszefuederen. Do mierkt een dann ganz schnell, datt se zwar vill braddelen awer wéineg Argumenter hunn. An dat ass och de Grond, wisou se sech vun deenen Tables Rondes trotz Invitatioun vun eiser Säit fern gehalen hunn.

  5. Thierry:

    > Ech hunn mer aus zouverlässege Quellen soen gelooss, dass et schon bei den Table Ronden vun den Jugendparteien déi Gréng waren, déi drop insistéiert hunn den adrenalin anzelueden, an deenen domatter eng Plattform ze ginn ouni jemols eppes um organisatoreschen Plang matgehollef ze hunn.

    A wat bréngt ignoréieren? Wann d’ADR Sch**ss proposéiert an voller inkompetent Läit ass, da soll dat och roueg ëffentlech gemaach ginn. Wa net, da knechelen se an hierem eegenen Eck ronderem a rekrutéieren do hier Fans. Ass dat besser? Gët dach näischt besseres wéi inkompetent Läit, déi sech ëffentlech lächerlech man!

    Ech ginn dem Manuel Recht, dass se ze ignoréieren, se an eng Opferroll bréngt, déi sech ausschluechten kënnen!

    > Mussen mer rietsextrem nei définéieren? Et kann een jo awer ethnizistesch an antipluralistesch (d’Héichhierwen vun der lëtzebuergerscher Sprooch an der lëtzebuergescher Kultur) an autoritär (d’blannt Verteidegen vum Grand Duc fir d’Bewahren vun der Hierarchie) Tendenzen am ADR erkennen…

    An sou Tendenzen maachen d’Partei direkt rietsextrem? Ech gesinn awer nach Ennerscheeder zu enger NPD, zum Beispill, … Wat nët heescht, dass an der ADR net vill Brach verzaapt gët an do iwwerproportionell vill Schwachkäpp sëtzen. A generell ass d’ADR haaptsächlech populistesch, opportunistesch an ein Fähnlein im Winde.

    A wéi gewosst ass, gesinn ech perséinlech keen Problemer domadder fir dat lëtzebuergescht Element an eiser Gesellschaft opmanst ze schützen … mee dat wäert mech jo lo dann och rietsextrem man?

    Ah jo, a fir se mat der NSDAP ze vergläichen ass jo einfach lächerlech. Duerch esou Vergläicher mëss de dech net grad méi crédibel …

  6. Wann déi Gréng dat mat der ADR wierklech sou gesot a gemengt hunn – an net einfach sou als Ajoute zur Haaptmeldung dass si den André Hoffmann ënnerstëtze wëllen, well dee brauch jo wierklech Ënnerstëtzung als Eenzelnen – da ginn ech der Recht: sou eppes seet een net am Virfeld vun enger Legislaturperiod ier d’Chamber feststeet, dat wier puer Wichtegtuerei an erënnert mech beschtefalls un d’Riedensart “Kleinvieh macht auch Mist”.

    Vläicht ass et awer och esou, dass RTL alt erëm Polemik schafe wollt, well déi Gréng an déi Lénk, dat passt jo souwisou vill ze gutt (stellt iech vir, ech hu meng 23 Kräizercher op deenen 2 Lëschte verdeelt gehat) an deemno géif sou eng Meldung eleng (mech op d’mannst) jo dach zimlech calme loossen. Also schafe si léiwer Kontraster an den ADR däerf och an den Artikel. Am Manuel sengem Kommentar liesen ech eraus, dass et effektiv sou war.

    Deemno misst du also éischter op RTL klappen wéi op déi Gréng. A bei deem wat déi sech scho geleescht hunn (an nach leeschte wäerten) do brauch een net ze fäerten, dass et op eemol kee Grond fir Bashing méi wäert ginn. :D

    Zu de Jugendparteien: Mir hunn dach awer all gutt gelaacht wéi mer während dem Video-Chat getwittert hunn. Voilà!

  7. Op een eng Partei wéi den ADR soll ignoréieren oder net, ass eng Diskussioun déi ech och schon eng Kéier viurn e puer Joer (ier den ADR eng Partei war) mat engem Kolleeg aus der JSL hat. Deemols sinn mer eis och net eenz ginn. Et ass net esou, dass ech net duerchaus géing agesinn dass et keng Léisung ass déi Partei z’ignoréieren. Mee ech sinn mer awer och net esou sécher op et vill bréngt, wann déi Partei Plattformen offréiert kritt. Well iergendwelch Leit iwwerzeegen se emmer. Ech weess, dass et leider keen Wonnermëttel géint déi Partei gëtt. Mee wann ech dat eent Extreemt fuerderen wëll ech dach eigentlech just doropper opmierksam maachen: et ass extreem delikat ze décidéieren, wat déi richteg Approche ass. Et gëtt jo keen Präzedenzfall, wou eng bestëmmten Method funktionéiert hätt.

    Déi Tendenzen sinn dräi vun de véier Merkmaler fir Rietsextremismus. Villäicht sinn se nach keng vollwerteg rietsradikal Partei. Mee z’ignoréieren, dass se sech lues a lues droropper zoubeweegen ass e Schoss deen iergendwann garantéiert no hannen lass geet.

    Ech sot jo ni, dass een d’lëtzebuergesch Kultur net soll erhalen an schützen. Ech sinn fir Pluralismus. De Problem beim ADR ass: si sinn antipluralistesch. Si wëllen lëtzebuergesch Kultur a nemmen lëtzebuergesch Kultur.

    De Verglach mat der NSDAP war eenzeg fir ze weisen, dass eng Partei vläit net onbedengt muss oppen rietsradikal optrieden, dass se dat awer trotzdem kann sinn. Wahrscheinlech ass den ADR keng NSDAP (ech géing och eigentlech net esou wäit goen, fir esou eng massiv Agenda sinn se vill ze blöd). Mee mir kënnen hier Agenda, wat och emmer et ass, net kennen. An d’Geschicht weist eben, dass esou eppes bei Parteien wäit riets am politesche Spektrum kann geféierlech ginn.

    Et stoung net nemmen op RTL. Ech sinn zum Beispill och am Wort iwwert déi Meldung gefall. Op Pobeier kann ech awer schlecht verlinken. ;) Okay, dat ass och erem nemmen d’Wort… Mee wann mer dee Gedankegang weiderféieren, dann kommen mer alt erem nemmen zur Schlußfolgerung, dass et guer keng gudd Medien hei am Land ginn.

    Fir et dann nach eng Kéier, mam Manuel senge Wierder, ze soen:

    Wat mech éischter stéiert, ass datt iwwerhaapt sou Ennerstetzungen ausgeschwat ginn.

    An ier der mer elo hei nach all weider virwerft, ech hätt iergendeppes géint déi Gréng: ech hunn hinnen en Deel vu mengen Stëmmen ginn. Et also net esou, ewéi wann ech iergendwelch Virurteeler géigeniwwer där Partei hätt iwwert déi ech net kéinnt ewech gesinn.

  8. De Problem bei der Ennerstetzung vum adr ass jo dass déi Gréng domatter géint de Wielerwellen ginn. De Bierger huet demokratesch entscheed fir dass déi Partei manner soll zesoen hunn. Dat ass e Fakt. Do fannen ech et fatal, dass een dann higeet a seet dass een däer Partei awer well hellefen fir dass se erem méi Méiglechkeeten hunn. Do muss ech déi Lénk heichluewen (wat ech secherlech net emmer maachen), déi sou eng Ennerstetzung fir den adr jo kategoresch ofgeléent hunn. An dat heescht jo net dass den André Hoffmann net och eng Kéier mam adr fir oder géint eng Propositioun/Project stemmt.

    Zu den Jugendparteien: Wat mech gestéiert huet ass dass nodeems alles organiséiert war an déi “4 grouss” all e Bezierk haaten, de Salle haaten, e Moderator haaten, etc. etc. e beemol déi jonk Gréng fonnt hunn dass een do roueg kéinnt dann all d’Parteien alueden. Firwaat hunn – et waren der jo herno 5 am Ganzen déi deel geholl hunn – déi Lénk dunn net eng Table ronde iwwert Europa organiséiert? D’Bett gouf vun de “4 Groussen” gemaach an de Rescht konnt sech och dra léen. Dat ass wéi wann ech mat mengem Nooper all Daag op d’Arbescht fueren, mir eis mat eise Auto’en ofwiesselen an hien e beemol een aaneren invitéiert fir einfach esou als Beifahrer matzefueren.

    @ Georges
    “Vläicht ass et awer och esou, dass RTL alt erëm Polemik schafe wollt”

    Déi Gréng hätten jo net missten sou eng Zesummenarbescht mam adr agoen, oder dann an enger Pressekonferenz et bekannt ginn. Op dat elo eng Randnotiz soll sinn, oder net: “That may not be good news for you, but it *is* news!”, wéi den Danny am West Wing sou schéi seet. An ech fannen eigentlech dass den RTL (an d’Wort a villeicht och de Feierkrop e Freiden) do nemmen hier Arbescht maachen, dat heescht déi Nooricht déi sie op der Pressekonferenz kréien dem Bierger wéider zevermettelen.

  9. Ah lo si mer scho bei Zesummenaarbescht. :-)

    Wourems ass et gaang bei där Saach? Fir an der Chamber eng Motioun anzebréngen, brauchs de 5 Ennerschreften. Dat ass eng Regelung iwwert déi ee streide kann. Déi Gréng hunn op hirer Pressekonferenz gesot, si géifen den Hoffmanns Änder beim Abrénge vu senge Motiounen ennerstetzen, wat ech ok fannen (och well ech déi Regelung net gutt fannen, all Volleksvertrieder sollt déi selwecht Rechter hunn). Op Nofro hinn vun engem Jouralist, op dann och den ADR esou ennerstetzt géif ginn, gouf gesot: dann, wann et inhaltlech ok ass (geneen Wuertlaut wees ech net). Voila.

    Nach eng Kéier zu de Jugendparteien: souwäit ech wees ass dat ganzt jo op d’Initiativ vunn der JDL ausgaang. Wisou huet d’JDL da net vu vir eran déi aner invitéiert gehat? Ech si mer zimmlech secher, datt déi aner och e Sall an e Journalist fonnt hätten, wann een se an d’Organisatioun mat agebonne gehat hätt. Dat ass net wierklech ee groussen Opwand. Do mess de der et e bessen einfach.

  10. Wow, déi Kommentarer hei liesen sech wéi dat Spill “Telefon”, wat mer als Kand gespillt hunn. Ee seet eppes, den nächste versteet et falsch a seet et falsch weider, asv. Dat geet beim RTL un, geet iwwert den Thierry, bis zum Tom. Lies- a Lauschterkompetenzen missten wierklech an der Edukatioun méi gefuerdert ginn.

Leave a Reply

Your email address will not be published. Required fields are marked *