Killer Strawberry

Et ass kee Geheimnis, dass ech London op den Doud net kann ausstoen. Verschidden Ecker vun der Stad gefalen mer awer trotzdem, zum Beispill The Lexington, wou ech Samschdes war, an och Camden, dat esou radikal anescht ass vum Recht vu London, dass een sech muenchmol muss drun erënneren a wéi enger Stad een ass.
Dat Schéint u Camden ass, dass et alternativ ass. Hei lafe frëndlech Punks ronderëm, Goths sëtzen tëscht Touristen op der Trap virum Wetherspoon’s, honnerte kleng Geschäfter verkafen all Méigleches vu Waasserpäifen iwwer Korsetter an Antiquitéiten bis hin zu T-Shirten mat mol, méi mol manner orignelle Spréch, während engem vun iwwerall Iessen an d’Gesiicht gehale gëtt vun Asiaten déi ee wëllen iwwerzeegen e puer Nuddelen ze kafen déi schon dräi Deeg opgewiermt ginn. Stellt iech d’Stater Braderie mat e puer zéngdausend Leit an iwwert déi fënneffach Fläch fir. Dotëschent ginn et, wann een sech drop aléisst – an wann een eng Grëtz Gedold huet, sollt een – richteg Pärelen.
Den Alan Burdett ass esou ee Fall. Am Camden Lock verkeeft hien selwer seng Créatiounen, ënnert dem Numm Killer Strawberry. Et ass ee klenge Stand um éischte Stack vun dësem alen Gebei, an wann ee net oppasst leeft een am Gewulls séier laanscht. Seng Zeechnungen ginn et als Print an als selwer gedréckten T-Shirten, nierwebäi verkeeft en och eng handvoll Stofftuten. Op senger Websäit ass leider nëmmen e Brochdeel vu sengen Zeechnungen – ënnert anerem déi Prints, déi ech mer kaf hunn, feelen – mä et ass trotzdem e Bléck wert fir Leit déi net grad zu London ronderem lafen.
Wat mech, nierwt sengen Zeechnungen déi mech wierklech uspriechen, esou begeeschtert ass de simple Fakt, dass een ka mam Kënschtler selwer schwätzen. Ee feine Kärel, deem een d’Begeeschterung fir seng Konscht direkt ofgesäit, an esou eppes fannen ech extrem sympathesch. An esou oft ech mer am Internet T-Shirten bestellen, engem Kënschtler direkt d’Suen an d’Hand ze ginn well een säi Wierk appreciéiert huet eppes Perséinleches dat wonnerbar ass.

Leave a Reply

Your email address will not be published. Required fields are marked *